بئکوو نیوز:ایل بویو آذربایجان خالقی اؤزه ل گونلری عزیزله ییب او گونلر اوچون بیر پارا دبلر و عنعنه لر یارادمیشلار کی اونلارداندا بیری « جیلله گئجه سی » دیر. چیلله سؤزو قیشین ایلک قیرخ گونوندن آلینمیش دیر کی چوخ اسکی و تاریخی بیر کئچمیشه صاحیب دیر. سون باهارین ( پاییز ) سون گئجه سی و صاباحی قیشین ایلک گونو ائل آراسیندا چوخ سئوینج لی و شادلیقلارلا دولو اولان بیر گون اولاراق تانینان چیلله گئجه سی و چیلله آخشامی آدلانیر.
بئکوو یا همان بکرآباد کندینین میللتی ده بو دبلردن اوزاق دورماییب و هر ایل بوگونو چوخ اؤزل قارشیلاییرلار. بئکوو دا دا پاییزین سون گئجه سی و قیشین ایلک گونو کی همان چیلله گئجه سی دیر جماعت قارپیز، نار، پورتاغال و ساییر میوه لر آلیب آغ ساققاللارینین ائوینده بیر یئره ییغیشار کن شادلیقلار ائده ر لر.
چیلله گئجه سی نیشانلیلار آداخلی لارینا خونچا یوللایارلار و بوتون دوست - قوهوم لار خونچالاری حاضیرلاماقدا کمک لیک ائده ر لر. خونچالاردا عبارت اولانلار یاخشی شیرینی، به زه نيلميش قارپیز، پالتار و گاهدان قیزیل،پاخلا و پشمک اولار کی بونلاری گون باتانا یاخین دامادین یاخین قوهوملاری خونچالاری باشلارینا قویوب و بیریده قارپیزی قولتوخونا آلیب بیرلیکده گلین ائوینه آپاراللار. خونچا گئتیرنلره ده قیز آناسی طرفینن انعام اؤده نیلر. نئچه گون سونرا خونچالاری قایتارار کن اونلارین بیرینده دامادا بیر دست پالتار یا هر نه کی آلینیب و دامادین آناسینا چادرالیق و بیر قوطی شیرینی یوللارلار.
بئکوو میللتینین آراسیندا دا چیلله لر حاققیندا مختلف حیکایه لر واردیر کی ان مشهوری بئله دیر:
چیلله لر ایکی باجی دیر، بیری بؤیوک باجی بیری سی کیچیک باجی. گونلرین بیر گونو باجیلار اییده آغاجینین آلتیندا اوتوروب صؤحبت ائلییر دیلر. هه ... کیچیک چیلله بؤیوک چیلله یه دئییر کی:
باجی سن گئدین نه ائله دین؟
بؤیوک چیلله ده دئییر کی :
من گئدیم دوندوردوم، اووشوددوم و ناخوشلادديم گلدیم!
بالاجا باجی گولوب دئدی:
من سنین کیمی دئیلم! من گئدیب؛ قاری لاری کوره کدن، لوله حلری لولک دن، گلین لری بیلک دن و کؤرپه لری بلک دن ائیلرم!
جاوابیندا بؤیوک باجی گوله گوله دئییر:
باجین اؤلسون سن بیر ایش گؤره بیلمز سن کی! سنین عؤمرون آزدی، گؤتون یازدی!
جماعت چیلله گئجه سینده آغ ساققاللارینین ائوینه ییغیشیب شام یییه نن سونرا قارپیز و ساییر میوه لری گئتیرللر کی آغ ساققال الینه بیر پیچاق آلیب سای حسابی قارپیزی بؤلوملر.
بئلی . . . بئله لیکله پاییزین سون و ان اوزون گئجه سین سحره چاتتیراللار.
عزیز اوخوجولار ! شن گونلرینیز، چیلله گئجه لرینیزجه اوزون و چیلله گئجه نیز ، گؤزل گونلرجه موتلو اولسون